Rusiye akimiyeti bildirgenine köre, Ukrayina uruş uçucısızları mayısnıñ 21-nde aqşam Rusiye regionları ve işğal etilgen Qırımğa ücüm etti, neticede Moskvadaki ava limanlarınıñ işi toqtağan edi.
Rusiye Mudafaa nazirliginiñ haberine köre, Moskva saatınen 18-den 24-ke qadar umumen 114 uçucısız tüşürildi.
Berilgen malümatqa köre, uçucısızlar Moskva, Kursk, Râzan, Orel, Kaluga ve Tula vilâyetlerinde ve işğal etilgen Qırımda urıp tüşürildi.
Azatlıq Radiosınıñ Rus hızmeti haber etkenine köre, «Domodedovo» ve «Jukovskiy» Moskva ava limanları mayısnıñ 21-nde aqşam eki kere işini toqtattı – anda «Kilim» planı çalışa edi, ava boşluğınıñ bütünley toqtatılmasını belgilegen hususiy rejim.
Aqşam ücümleriniñ diger aqibetleri aqqında haber etilmey.
Mayısnıñ 21-nde kündüz Moskva akimiyeti Rusiye paytahtına uçqan dronlarnıñ yoq etilüvi aqqında bildirdi.
Mayısnıñ 21-ne keçer gecesi uçucısızlarnıñ ücümi neticesinde Rusiyeniñ Örel vilâyetinde Bolhov zavodınıñ obyektleri zarar kördi. Ukrayina Silâlı quvetleriniñ Baş ştabı «Rusiye arbiy-sanayı kompleksiniñ eñ az 19 müessisesine mahsulat bergen» zavod zarar körgenini tasdıqladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
