Rusiye tarafından mahküm etilgen qırımlı vatandaş jurnalisti Rustem Şeyhaliyev Rusiyeniñ Amursk vilâyetindeki Blagoveşçensk apishanesine etap etildi. Bu aqta ömür arqadaşı Suriya Şeyhaliyeva bildirdi.
Erkek Krasnoyarsk ülkesiniñ Yeniseysk apishanesinde tutulğan edi.
«Rustemniñ yazğanına köre, apishaneden onı Krasnoyarsk tranzit-yollav noqtasına alıp ketkenler, andan ise İrkutsk şeerine. İrkutsk tranzit-yollav noqtasından ömür arqadaşımı Çitağa etap etkenler. Anda ise Blagoveşçenskke alıp ketkenlerini ögrendi», – dep yazdı Şeyhaliyeva.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Aq qorçalayıcı teşkilâtlar Remzi Bekirovnıñ koloniyadaki sert tutuv şaraitleri sebebinden azat etilmesine irişmege çağıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
