Quralaynıñ 23-nde Qırımnıñ Tav Bardaq qasabasında "terrorizmge qarşı talimler" adı altında Rusiye quvetçileri filtratsiya tedbirlerini keçirecekler, dep bildire Milliy tirenüv merkezi.
"Quralaynıñ 23-nde Tav Bardaq qasabasında işğalciler terrorizmge qarşı talimler keçirecek — kerçekten ise küç qullanuvınen basqı elementleri ile filtratsiya keçirecek", — dep aytıla haberde.
İnsanlarğa "barışıq saqlamaq" ve "mahsus hızmetlerniñ talaplarını yerine ketirmek" tevsiye etildi. Amma bundan soñ — tahliye, soqaqlarnıñ qapatıluvı, vesiqalarnıñ teşkerüvi ve tintüvler. "İşançsızlarnı" qıdıralar", —dep qoştılar Milliy tirenüv merkezinde.
Muarririyet bu malümatnı mustaqil olaraq teşkeremez.
Qırımtatar resurs merkeziniñ evelki esaplarına köre, 2024 senesi Rusiye Qırımda eñ azından 124 arbiy talim keçirdi. Bu, evelki yıllarğa baqqanda bayağı arttı: 40 talim 2023 senesi, 20 — 2022 senesi, 44 — 2021 senesi.
2022 senesi arman ayından başlap Qırım ve Aqyarda aman-aman er kün patlav sesleri eşitile. Rusiye akimiyeti «Ukrayina uçucısızlarına» qarşı atış, «ava mudafaasınıñ işi» ve Rusiye arbiyleriniñ «talimleri» dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.